Bakı sakini İntiqam Qasımov 4 ildir ki, əmək pensiyası ala bilmir. 20 ildən artıq zərərli əmək təcrübəsi olduğunu deyən vətəndaş hələ də nəzərdə tutulmuş güzəştdən faydalana bilməyib.

İ. Qasımov bu şikayətlə bağlı “Qafqazinfo”ya müraciət edib. Onun sözlərinə görə, 1986-cı ildən Əhaliyə Məişət Xidməti Nazirliyinin tabeliyində yaradılmış “Zərgər” müəssisəsində, 2000-2014-cü illərdə isə “Zərgərlər” ASC-də işləyib. 20 il iş təcrübəsinin tamamında güzəştlə yaşa görə əmək pensiyası üçün müraciət etsə də, onu get-gələ salıblar: “Pensiyaya çıxmaq üçün DSMF-nin “ASAN Xidmət”də müvafiq şöbəsinə müraciət etdim. Dedilər ki, sosial karta vəsait daxil edilməyib. Məni get-gələ saldılar. Halbuki, sonradan pul karta oturuldu. Amma illərdir ki, məni yubadırlar, pensiya ala bilmirəm”.

Şikayətlə bağlı Əmək və Əhalinin Sosial Müdafiəsi Nazirliyinin tabeliyində Dövlət Sosial Müdafiə Fonduna müraciət etdik. Fondun İctimaiyyətlə Əlaqələr departamentinin müdiri Rəşad Mehdili “Qafqazinfo”ya bildirib ki, problem araşdırılacaq və qısa müddətdə qərar veriləcək: “Vətəndaş İntiqam Qasımov tərəfindən DSMF-yə son illər müraciət daxil olmayıb. Fondun Xüsusi Şərtlərlə Təyinat üzrə Mərkəzi Filialı tərəfindən vətəndaşla əlaqə saxlanılaraq ona müvafiq sənədlərlə Mərkəzi Filiala müraciət etməsi tövsiyə olunub. Sənədlər Mərkəzi Filialda araşdırıldıqdan sonra İ.Qasımovun güzəştli şərtlə yaşa görə əmək pensiyası hüququnun yaranıb-yaranmaması barədə qısa müddətdə qərar veriləcək və bu qərar barədə o, məlumatlandırılacaq”.





Paylaş: