İyunun 15-də axşam saatlarında yağışla müşayiət olunan güclü külək Yevlax rayonunun yaşayış məntəqələrinə ziyan vurub.

Külək nəticəsində Yevlax şəhərində ağaclar qırılaraq elektrik xətlərinin üzərinə aşıb, rayonun elektrik təsərrüfatına ciddi ziyan dəyib, rayon üzrə 14 min abonentin (50 faiz) elektrik təminatı dayandırılıb.

Yevlax şəhərinin Nizami prospektində ticarət obyektinin, Q.Quliyev küçəsində 5 mərtəbəli, 45 mənzilli yaşayış binasının, Q.Əşrəfbəy küçəsində 5 mərtəbəli, 60 mənzilli yaşayış binasının dam örtüyü uçub.

Güclü külək nəticəsində şəhərin Nizami prospektində ağacın aşaraq Yevlax şəhər sakini, 1981-ci il təvəllüdlü Əliyev Rahib Fazil oğluna məxsus “Volsvagen Passat” markalı avtomobilin üzərinə aşıb.

Bakı-Ələt-Qazax-Gürcüstan sərhədi avtomobil yolunun Yevlax şəhəri ərazisindən keçən 288-ci kilometrliyində, yolun kənarında yerləşən avtoservis binasının dam örtüyü uçaraq yola düşməsi nəticəsində yolda avtomaşınların hərəkəti 20 dəqiqə dayanıb.

Yüksək gərginlikli 6 kv-luq elektrik hava xəttinin dayağı Ərəbbəsrə kənd sakini Məmmədov Kərim Fərrux oğluna məxsus fərdi yaşayış evinin üzərinə aşması nəticəsində evin dam örtüyünə ziya dəyib. Külək nəticəsində rayonun Varvara kəndində də elektrik dirəyi qırılaraq aşıb.

Hazırda dəyən ziyanın araşdırılması davam etdirilir.