Rəsmi məlumata əsasən, 2024-cü ildə Azərbaycanın Birləşmiş Ərəb Əmirlikləri iqtisadiyyatına birbaşa xarici investisiyaları 457,531 milyon ABŞ dolları təşkil edib.

Musavat.com-un xəbərinə görə, iqtisadçı-ekspert Natiq Cəfərli bildirib ki, Azərbaycan investisiyaları BƏƏ iqtisadiyyatına yatırılan ümumi birbaşa xarici investisiyaların 26 faizini təşkil edib.

İqtisadçı qeyd edib ki, investisiyaların həcmi 2023-cü illə müqayisədə 4,82 dəfə və ya 362,712 milyon ABŞ dolları artıb:

“Yəni 2024-də BƏƏ-yə qoyulan investisiyalarda hər 10 dollardan 2,6 dolları Azərbaycan pulu olub və bu investisiyalar 2023-cü illə müqayisədə 5 dəfə (!!!) artıb.

Yaxşı, bu investisiyaların strukturu nədir? Özəl sektordur, ya dövlət investisiyalarıdır? Özəl sektordursa, niyə Azərbaycana investisiya qoymur, BƏƏ-yə yatırım edirlər?! Dövlət investisiyalarıdırsa, lap yaxşı, hara yatırım olunub, bu yatırım dövlət büdcəsinə nə qədər və hansı zaman kəsimində dividend gətirəcək?!

Bəlkə özəl sektor ona görə BƏƏ-yə yatırım edir ki, orada vergi-gömrük rüsumları azdır, qanunlar çalışır”.

Qeyd edək ki, ötən il Azərbaycan Dövlət Neft Fondu (ARDNF) Birləşmiş Ərəb Əmirliklərində təhsil şəbəkəsinə 100 milyon dollar yatırım edib.

ARDNF “GEMS Education” şirkətinə yatırımı 17 iyun 2024-cü il tarixində investorlar konsorsiumunun üzvü olaraq edib.

Qeyd edilib ki, Fondun yatırım etdiyi “GEMS Education” 12 illik təhsil üzrə dünyanın ən böyük və qabaqcıl özəl təhsil müəssisələri şəbəkəsinə malikdir. Şirkət 1959-cu ildə Birləşmiş Ərəb Əmirliklərində yaradılıb.

Sözügedən investisiya ARDNF-nin Yaxın Şərqə birbaşa olaraq etdiyi ilk yatırımdır.