ABŞ Prezidenti Co Bayden administrasiyasının nümayəndələri oktyabrın ortalarından Qəzza zolağının münaqişədən sonra idarə olunması üçün çoxfazalı plan hazırlayır.

Bu barədə “Politico” qəzeti iki amerikalı rəsmiyə istinadla məlumat yayıb.

Məlumata görə, bu plan anklavda vəziyyəti sabitləşdirmək üçün beynəlxalq qüvvələrin müvəqqəti dislokasiya müddəti başa çatdıqdan sonra bölgənin Fələstin hakimiyyətinin nəzarətinə keçməsini nəzərdə tutur.

Qəzet mənbələrinin sözlərinə görə, Dövlət Departamentinin, Ağ Evin və digər departamentlərin rəsmiləri bir neçə həftədir ki, çoxsaylı siyasi sənədlərdə və idarələrarası görüşlərdə Qəzzanın gələcək strukturu ilə bağlı təklifləri müzakirə edirlər.

Ümumi konsepsiya İsrail qoşunları ilə HƏMAS yaraqlıları arasında şiddətli döyüşlər başa çatdıqdan sonra Qəzzanın çoxmərhələli yenidən qurulmasına əsaslanır. Amerikalı strateqlər hesab edirlər ki, bölgədə vəziyyəti yaxın gələcəkdə sabitləşdirmək üçün beynəlxalq qüvvələrə ehtiyac olacaq və uzunmüddətli perspektivdə hakimiyyət modernləşdirilmiş Fələstin Muxtariyyətinə keçəcək.

Rəsmilər, həmçinin bildiriblər ki, bu həll planı tam ideal olmasa da, həyat qabiliyyətlidir və İsrailin əməliyyatı başa çatdıqdan sonra Qəzzanı idarə etmək üçün ən yaxşı variant kimi görünür. Ancaq bu planın ABŞ-ni İsrail hökuməti ilə qarşıdurma yoluna çıxarmaq ehtimalı da istisna deyil.

Eyni zamanda, “Politico”nun mənbələri vurğulayıblar ki, Amerika tərəfinin planları inkişafın ilkin mərhələsindədir və onların həyata keçirilməsi bir çox gözlənilməz dəyişənlərdən asılıdır.

Qəzet əlavə edib ki, ABŞ rəsmiləri Fələstin anklavında şiddətli döyüşlərin ən azı bir neçə həftə davam edəcəyini gözləyirlər.