Zaqatalada doğuşdan sonra ananın xəstəxanada ölməsi ilə bağlı xəbər vermişdik.

Rayon prokurorluğundan bildirilib ki, rayonun Çökək kənd sakini 1995-ci il təvəllüdlü Rəna Ramazanovanın martın 21-də Zaqatala rayon mərkəzi xəstəxanasının Reanimasiya şöbəsində ölməsi faktı ilə bağlı Cinayət Məcəlləsinin 314.2-ci maddəsi ilə cinayət işi başlanıb.

İş üzrə zəruri istintaq tədbirləri davam etdirilir.

Qeyd edək ki, R.Ramazanova uşaq dünyaya gətirmək üçün martın 18-də xəstəxanaya yerləşdirilib. Martın 19-da qeysəriyyə əməliyyatı ilə uşaq dünyaya gətirən qadının bədənində dözülməz ağrılar başlayıb. Lakin həkimlər xəstənin yaxınlarına bunun ciddi bir şey olmadığını deyiblər. Xəstənin vəziyyətinin ağırlaşdığını görən həkimlər martın 21-i səhər saatlarında onu reanimasiya şöbəsinə yerləşdiriblər. Bir neçə saat sonra R.Ramazanova orada dünyasını dəyişib.