Amerikanın ən məşhur teleaparıcılarından biri və rus təbliğatının sevimlisi Taker Karlson ilk dəfə Rusiyaya gedib.

“Mash” teleqram kanalı jurnalistin fevralın 1-də İstanbuldan Moskvaya gəlməsini bildirib.

Kanal Karlsonun hava limanından və “Bolşoy Teatr”dan fotoşəkillərini dərc edib.

Rusiya təbliğatı hesab edir ki, Karlsonun Moskvaya səfərinin əsas məqsədi Putinlə müsahibədir.

Amerikalı teleaparıcının Putindən müsahibə istəməsi faktı hələ 2023-cü ilin avqustunda RT-nin baş redaktoru, təbliğatçı Marqarita Simonyan bəyan etmişdi. Teleaparıcının özü İsveçrənin “Die Weltwoche” jurnalına deyib ki, o, əvvəllər Putindən müsahibə almağa çalışıb, lakin ABŞ hakimiyyəti ona icazə verməyib.

“Bloomberg” Rusiya hakimiyyətinin mövqeyi ilə tanış olan mənbəyə istinadən xəbər verib ki, Kreml Putinin amerikalı teleaparıcıdan müsahibə alması imkanını müzakirə edir.

Rusiya prezidentinin mətbuat katibi Dmitri Peskov, Karlsonun səfəri ilə bağlı suala cavab olaraq, xarici jurnalistlərin hərəkətlərini şərh etməkdən imtina etdi:

“Hər gün çoxlu xarici jurnalistlər Rusiya Federasiyasına gəlir. Çoxları burada işləməyə davam edirlər. Biz bunu alqışlayırıq. Prezidentlə, o cümlədən xarici media ilə hər cür müsahibələrə gəlincə, hazırda sizə verəcək cavabımız yoxdur”.

Karlsonun prezident administrasiyasını ziyarət etməsi ilə bağlı xəbərlərdən sonra Kremlin sözçüsü amerikalı jurnalistin hərəkətlərini şərh etmədiyini bildirib.