ABŞ prezidenti Donald Tramp hesab edir ki, yeni gömrük rüsumlarının tətbiqi ölkə iqtisadiyyatına 6-7 trilyon dollarlıq investisiya axınına səbəb olacaq.

Musavat.com xarici agentliklərə istinadən xəbər verir ki, prezidentə görə, tariflər nəticəsində Amerika fond bazarında əsas kotirovkalar da gələcəkdə artım göstərəcək. 

Floridaya uçmazdan əvvəl tariflərin ABŞ fond bazarına təsirindən danışan Tramp "hesab edirəm ki, hər şey çox yaxşı gedir" deyib. O, jurnalistləri əmin edib ki, "bazarlar çiçəklənəcək. Ölkə sürətli inkişaf yaşayacaq”.

Qeyd edək ki, Trampın rüsum qərarı açıqlanandan ötən 24 saat ərzində Amerikanın texnologiya nəhəngləri 2 trilyon dollar itiriblər. Onların yanvardan bəri itkiləri 7 trilyon dolları keçib. Qərarın açıqlandığı gün ABŞ fond bazarında ticarət əsas kotirovkaların azalması başlayıb. Azalma 2,9-4,6 faiz təşkil edib. 

Həmçinin ABŞ dolları 6 valyutalı səbətə qarşı 1.5 faiz, ayrıca avroya qarşı 2.26 faiz(1 dollar = 1.11 avro) dəyərsizləşib. 

Qeyd olunur ki, dollar son iki ildən çox müddətdə ən böyük günlük itkisini yaşayıb. Makro treyderlər Trampın ticarət tərəfdaşlarına qarşı tarifləri açıqlamasının ardınca ABŞ dollarını kütləvi şəkildə satırlar.