Yaz fəslinin ölkəmizə daxil olmasına baxmayaraq, ölkədə, xüsusilə paytaxtda dəyişkən, yağışlı və soyuq hava şəraiti hökm sürür. Yanvar-fevral ayları ərzində havanın normadan isti keçməsi, hazırda isə soyuqların yenidən başlaması əhalidə çaşqınlıq yaradır. Hər kəsi isə bir sual maraqlandırır. Bu cür hava şəraiti nə vaxta qədər davam edəcək?

Mövzu ilə bağlı “Yeni Sabah”a danışan meteoroloq Cavid Hüseynov havanın soyuq keçməsinin səbəbini açıqlayıb:

“Mart ayının 21-indən etibarən artıq ölkəmizdə yaz fəsli müşahidə edilir. Yaz fəsli soyuq qış və isti yay fəsli arasında keçid faza olduğuna görə sinoptik  şəraitin və hava  kütlələrinin  tez-tez  dəyişməsi, meridional  atmosfer  proseslərinin, həmçinin də siklon  antisiklonların  daha  intensiv  olması  müşahidə  olunur. Yaz fəslində ölkəmizin iqlim şəraiti Mülayim enliklərin və Arktik hava kütlələrinin təsirinə daha çox məruz qaldığına görə Mart və Aprel aylarında sinoptik şəraitin qısamüddətli dəyişməsi fonunda havanın  qeyri-sabit keçməsi, meteoroloji kəmiyyətlərin zəif və mülayim tərəddüdü, havanın orta aylıq temperaturunun  6-10°C isti, aylıq yağıntının miqdarının iqlim normasına yaxın olması, gün ərzində buludluluğun artması, fasilələrlə yağıntılı olması qeydə alınır.  Xəzər  dənizinin  yaxınlığı  da  hava kütlələrinin dinamikasına və sahilyanı ərazilərin meteoroloji şəraitinə  öz  təsirini göstərir”.

Ekspert bu vəziyyətin ay sonuna qədər davam edəcəyini bildirib:

“Yaxın günlərdə də  Bakıda və Abşeron yarımadasında havanın dəyişkən buludlu olacağı, arabir yağıntılı olacağı, qeyri-sabit hava şəraitinin Mart ayının sonuna kimi davam edəcəyi gözlənilir”.