Öz torpaqlarının erməni işğalından azad edilməsi uğrunda mübarizəni davam etdirən Azərbaycan Türkiyə üçün sadəcə dost ölkə deyil, qardaş ölkədir. Virtualaz.org “Anadolu”ya istinadən bildirir ki, bunu Türkiyənin Milli Müdafiə naziri Hulusi Akar İstanbulda Milli Müdafiə Universitetində növbəti təhsil ilinin açılışında deyib.
Türkiyə nazirinin sözlərinə görə, danışıqlar prosesi zamanı ATƏT-in Minsk qrupunun həmsədr ölkələri (Rusiya, ABŞ və Fransa) Ermənistan-Azərbaycan münaqişəsinin həllinə töhfə verə bilməyiblər. Ermənistan isə əksinə, qoşunlarını Azərbaycanın işğal olunmuş ərazilərindən çıxarmaq əvəzinə, işğal olunmuş ərazini genişləndirməyə çalışdı.

"Bakının səbri tükəndi, Azərbaycan Ordusu əks-hücuma keçdi və bu, uğurla davam edir", - deyə Akar qeyd edib.
“Azərbaycan Ordusu yüksək peşəkarlığa malikdir və beynəlxalq hüquq normaları çərçivəsində fəaliyyət göstərir. Zərbələr yalnız işğalçı qüvvələrin mövqelərinə endirilir. Ermənistan Silahlı Qüvvələrinə qarşı əməliyyatlar mümkün qədər dəqiq aparılır, Ermənistan isə bütün dünya ictimaiyyəti qarşısında Azərbaycanın yaşayış məntəqələrini atəşə tutur, günahsız mülki şəxslər ölür”, - deyə Hulusi Akar vurğulayıb.
Nazir Ermənistanın terror təşkilatları ilə, o cümlədən PKK ilə sıx qarşılıqlı fəaliyyətinə diqqət çəkib.
"Yerevan terrorçulara, xüsusilə də PKK-ya həmişə kömək edib. Bu, faktdır. PKK terrorçularının bir qismi işğal olunmuş Azərbaycan torpaqlarına köçürülməsi məqsədilə Ermənistana dəvət olunub..."-deyən Akar, Ankaranın Bakının ədalətli mövqeyini bundan sonra da sıx dəstəkləyəcəyini bildirib.


Paylaş: