Şəki rayonu Yeni Çələbixan qəsəbəsində məskunlaşmış Laçın rayonunun Kaha kəndindən olan məcburi köçkünlər RegionXəbərləricom.az saytı vasitəsi ilə Azərbaycan Respublikasının Prezidenti İlham Əliyevə, Elm və Təhsil Naziri Emin Əmrullayevə və Milli Məclisin Laçın rayonundan deputatı Rövşən Rzayevə məktəb bağlanması ilə bağlı müraciət ünvanlayıblar.

Müraciətdə qeyd olunur ki, 1993–1994-cü illərdən etibarən Laçın rayonunun Kaha kəndinin əhalisi kəndin adını yaşatmaq məqsədilə Şəki rayonunun Arıçılıq birliyi ərazisində kompakt şəkildə məskunlaşıb. Burada Laçın rayon Arıçılıq əsas məktəbi fəaliyyətə başlayıb və sonradan mərhum Prezident Heydər Əliyevin göstərişi ilə məktəbə şəhid Nüşirəvan Süleymanovun adı verilib – Laçın rayon Süleymanov Nüşirəvan Aydın oğlu adına Kaha kənd tam orta məktəbi.

Sakinlər bildirirlər ki, məktəb 20 ildən artıqdır fəaliyyət göstərir və Şəki rayonunda yerləşsə də, Laçın rayon Təhsil Şöbəsinin tabeliyindədir. Məktəbdə yalnız Laçın rayonundan olan məcburi köçkün ailələrin övladları təhsil alır.

Lakin 2024–2025-ci tədris ilindən etibarən Şəki-Zaqatala Regional Təhsil İdarəsi tərəfindən məktəbin bağlanması və yerində Şəki rayon Çələbixan tam orta məktəbinin yaradılması ilə bağlı təşəbbüslər irəli sürülüb. Müraciətdə sakinlər bu qərarla qəti razılaşmadıqlarını bildirərək aşağıdakı məqamlara toxunurlar:

Məktəbin adı Laçın rayonunun şəhid övladı Nüşirəvan Süleymanovun adını daşıyır və bu, şəhidin ailəsi üçün mənəvi təsəlli və fəxr mənbəyidir;

Kənd sakinləri hələ də doğma Kaha kəndinə köçürülməyiblər, yəni məcburi köçkün statusları davam edir;

Məktəbin bağlanması yalnız bir təhsil ocağının qapadılması deyil, eyni zamanda bir şəhidin xatirəsinin unudulması deməkdir;

Məktəb öz fəaliyyətində uğurlar qazanıb və Şəki rayonu üzrə nümunəvi təhsil müəssisələrindən biridir.

Sakinlər Prezidentə müraciətlərində qeyd edirlər:

“Siz hər zaman şəhidlərimizin adını uca tutan, onların ailələrinə xüsusi diqqət göstərən Ali Baş Komandan olmusunuz. Biz Sizin ədalətinizə və şəhidlərə olan dərin hörmətinizə güvənərək müraciət edirik. Sizdən xahiş edirik ki, Laçın rayonu Süleymanov Nüşirəvan Aydın oğlu adına Kaha kənd tam orta məktəbinin fəaliyyətinin davam etdirilməsi və bağlanmaması üçün müvafiq göstəriş verəsiniz.”

Müraciəti imzalayanlar arasında kənd ağsaqqalları və ictimai fəallar da var. Onlar məktəbin bağlanmasının qarşısının alınmasını və əvvəlki kimi Şərqi Zəngəzur Regional Təhsil İdarəsinin tabeliyində fəaliyyətini davam etdirməsini istəyirlər.

Kaha kənd sakinləri adından:

Mirzəyev Məhəmmədəli Səlim oğlu

Abdullayev Mütalib 

Mirzəyev  Qırımxan 

Mirzəyev İsa  

Süleymanov  Qardaşxan 

Süleymanov Namiq 

Səmədov Muradxan 

Səmədov Şiraslan 

Abdullayev Adil  

Abdullayeva  Maya 

Səmədov Arzu

Abdullayeva Xanım 

Sarıyev Simnar 

Mirzəyev Zamin 

Mirzəyev  Fəxri 

Mirzəyev  Arif 

Mirzəyev Əli

 Mirzəyev Şəhliyar 

Süleymanov Rəhim 

Mirzəyev Zöhrab 

Mirzəyev Fərhad