İspaniya hökuməti məktəblərdə qızardılmış və yağlı yeməklərin azaldılması məqsədilə yeni qərar qəbul edib. Ölkədə bütün məktəblərin menyusunda tərəvəz və meyvə yer alması, həmçinin həftədə bir dəfə balıq verilməsi məcburi hala gətirilib. Bu addım uşaqlar arasında artmaqda olan piylənmə hallarına qarşı mübarizə çərçivəsində atılıb.

Məsələ ilə bağlı kral fərmanı imzalanıb. Yeni qanuna əsasən, ölkədəki bütün məktəblər vəjetaryan və vegan yeməkləri menyularına daxil etməyə məcburdur.

Qaydalara görə, məktəblərdə təqdim olunan meyvə və tərəvəzlərin ən azı 45 faizi mövsümi və mümkün olduqca yerli istehsal olmalıdır. Bununla yanaşı, məhsulların 5 faizinin orqanik olması da tələb olunur.

Şirin içkilərə qadağa

Şəkər miqdarı 5 faizdən çox olan içkilərin məktəblərdə satışı tamamilə qadağan edilib. Bundan başqa, yemək və içkilərdəki kofein, yağ və duz miqdarına da məhdudiyyətlər qoyulub.

Hökumətin apardığı araşdırmalar nəticəsində avtomatlarda satılan içkilərin 70 faizinin şəkər və kofein miqdarının normanı keçdiyi müəyyən edilib.

Pizza və piroq ayda bir dəfə menyuya daxil ediləcək

Məktəblərdə hazırlanan pizza və piroqlar yalnız ayda bir dəfə menyuda yer alacaq. Qızartmalar isə yalnız zeytun yağı və ya günəbaxan yağı ilə hazırlanmalıdır.

Aralıq dənizi mətbəxi ilə tanınan ölkədə 2019-cu ildə aparılan bir araşdırma nəticəsində 6-9 yaş arası uşaqların 40 faizinin artıq çəkili olduğu, 17 faizinin isə piylənmədən əziyyət çəkdiyi müəyyən edilib.

Avropa İttifaqı ölkələri arasında İspaniya ən çox piylənmə halları qeydə alınan altıncı ölkə sayılır.